Ólavsøkukappríðingin skjótt 100 ár

Tað var longu í 1921 at skipað var fyri fyrstu ólavsøkukappríðingini. Tað vóru Edvard Samuelsen, Gustav Reinert og Kjartan Mohr sum skipaði fyri kappingini. Kappast var uppi á Sundsvegnum, frá portrinum við húsini hjá Hanus við Høgadalsá og 300 metrar longri niðri var málið, við stóru steinanar uttanfyri húsini hjá Verland Johansen

Síðani tá hevur verið kappast hvørt ár á ólavsøku, undantikið árini 1930-1935, tá eingin kapping var. 

Frá 1928 var kappast á Velbastaðvegnum, frá Miðhorni og heim móti krossinum, tá var riðið 400 metrar. Tá kappingin var uppafturtikin í 1936 var teinurin longdur til 500 metrar, tað er sami teinur ið enn verður brúktur.
Fyrsta kappingin á ólavsøku ið Føroya Ríðingarfelag skipaði fyri, var í 1943 - vinnari var Thomas Rubeksen við tíðini 33,4, hetta metið helt sær øll árini kappingin var á Velbastaðvegnum.
1971 var fyrstu ferð kappast á ólavsøku á breytini við Marknagil, og verður framvegis kappast har.
Tað eru nógv fólk ið hava sum fastan sið, at byrja ólavsøkudag á breytini við marknagil. Har møtast tey við vinfólkum og síðani gongur so leiðin oman aftur í býin, ella heim til fólk til ein betri bita.