Djóradagar komandi vikuskiftið

 

Vælumtókta tiltakið hjá Føroya Ríðingarfelag, Djóradagar verður nú leygardagin og sunnudagin.

Hjá nógvum familjum er tað vorðin siður, at leggja sær leiðina út í Havnardal tá Djóradagar eru. Tey hava har høvið at vitja djórini sum vanliga eru í dalinum, umframt nógv onnur forkunnug djór sum ikki eru at síggja vanliga.

 Eisini er hetta ein gyltur møguleiki at hitta vinir, og fólk ein vanliga ikki sær í dagligdegnum. 

Føroya Ríðingarfelag skipar eisini fyri kaffisølu og vera sum vant hoppiborgir o.a. til børnini. Teymaríðing ella ponyríðing sum tað eisini verður kallað er nakað sum er ovarliga á "to do" listanum hjá teimum flestu. Felagið hevur eina risa ríðihøll har nógv av tiltøkunum eru inni í, hetta er onkuntíð hent um okkurt ælið er.

Djóradagar er eitt familjutiltak burturav og er stuttligt at síggja somu snýðini ár aftaná ár. Tey vaksnu sum fyrstu árini komu við sínum børnum, koma nú við ommu og abbabørnum, umframt at nýggj andlit leggjast afturat á hvørjum árið. Hetta er greitt tekin um, at tá felagið byrjaði hetta tiltak á sinni, hava tey rakt ein tørv sum ikki hevur verið nøktaður áðrenn. 

Seinastu árini hevur felagið bygt nógv út á økinum. Hetta ger m.a. at umstøðurnar til kaffisølu og vesi eru munandi betri enn tær hava verið fyrr, m.a. er tað eitt stórt frambrot at man nú eisini hevur vesi til rørslutarnaði, hetta er nakað sum saknur hevur verið í. 

Nýggjar tíðir - Nýggj nevnd

 

F.v. Eyðfríð Mørkøre, tiltakslimur, Laila W. Mouritzen, nevndarlimur, Barbara R. Mouritzen, nevndarlimur, Osvald S. Johansson, formaður, Eva L.S. Klemmentsen, nevndarlimur, Eyðrið E. Hansen, tiltakslimur og Jeanette Danielsen, nevndarlimur.

Á vælmøttum aðalfundi í gjárkvøldið, var nýggj nevnd og nýggjur formaður vald at leiða Føroya Ríðingarfelag komandi árið. 

Felagið er sera virkið og hevur seinastu tíðina bæði útbygt felagshúsið og byggir eisini nýggjar ríðibreytir og stykkar út til nýggj fjós á økinum hjá felagnum í Havnardali. 

Nýggja nevndin fer nú í holt við at fyrireikað virksemið í summar, hetta umfatar m.a. FM kappingar í kappríðing og at fyriskipað vælumtókta familjutiltakið Djóradagar, ið verður seinasta vikuskiftið í mai mánaði. 

Aðalfundur 17 mars kl 19

Aðalfundur felagsins verður í felagshúsinum 17 mars kl 19. 

Skráin er hendan 

1. Frásøgn um virki felagsins í farna ári

2. Framløga av grannskoðaðum roknskapi til góðkenningar

3. Val av nevndarlimum, tveimum tiltaksmonnum, formannni og grannskoðara

4. Innkomin uppskot

5. Ymiskt

Kl 18 sama dag hevur rossahúsanevndin aðalfund

Nevndin

Skeið

 Frederikke Stougård – Undirvísing til øll støði 

Frederikke Stougård er ein royndur undirvísari, sum er sera sinnaður at hjálpa reiðfólkum á øllum stigum – frá nýbyrjarum til roynd reiðfólk.

Gjøgnum árini hevur hon fingið góð úrslit á fleiri ymiskum rossum og er kend fyri sínar fakligu førleikar, róliga tilgongd og evni at laga undirvísingina til bæði ross og reiðfólk. Hon er fleirfaldur danmarksmeistari, tvífaldur norðurlendskur meistari og hevur verið á landsliðnum seinastu 10 árini. Hon hevur luttikið í HM 5 ferðir og hevur verið í B og A finalum hvørja ferð við 2 ymiskum rossum. So hon veit eitt sindur um hvat hon tosar um. 

Við Frederikke fært tú ikki bert tekniska upplæring, men eisini undirvísing, sum byggir á tryggleika, motivatión og virðing fyri samstarvinum millum ross og reiðfólk.

Óansæð um títt endamál er at menna tína grundleggjandi ríðikunnleika, betra um tín teknikk ella taka næsta stigið móti kappingum, so gevur Frederikke tær røttu amboðini og stuðlar tær allan vegin.

Reiðkappin mikli níti ár

 

"Nú tosa øll um ítróttsbrøgd

á vøll’ og fimleikshøll,

men lívið lærdi okkum leik

á sjógv, um berg og fjøll."

Tað var navnframi Poul F, ið yrkti um hargabrøðurnar sum framdi nógv kappabrøgd, men vit reiðfólk hava nú í níti ár havt okkara egna kappa, ein sum av sonnum hevur framt mangt eitt bragd.

Talan er sjálvsagt um Svenning Reinert úr Norðadali, sum nú 1. jóladag fyllir níti ár.

Svenning Reinert er sjálv ímyndin av kappríðing sum ítrótt her á landi. Hann reið kapp fyrstu ferð longu í 1949. Hetta er somikið langtsíðani at avoldaða heimastýrislógin var enn fesk, fólkatalið í havnini var gott 5000 og føroyska fíggjarlógin var áljóðandi 5 milliónir danskar krónur. Men mest umráðandi fyri Svenning var helst at Føroya Ríðingarfelag var 6 ára gamalt og longu tá í fagrasta blóma.

Tá var riðið kapp úti á Velbastaðvegnum, málið var áraka har sum krossurin er. Hetta árið gjørdist Svenning nr. 2 í sínum flokki, á hesti nevndur Ørvarodd ið farbróðurin Tummas átti.

Síðani tá, ja síðani 1949 reið Svenning kapp hvørt ár líka til 2017. Hetta er heilt vist eindømi innan kappríðing, ikki bara í Føroyum, men í øllum heimunum. Longu árið eftir, í 1950 vann Svenning sína fyrstu, fyrstu virðisløn, hesaferð á hestinum Sjeik sum Heri Jensen átti.

Svenning gavst sum nevnt at ríða kapp í 2017, tað vil siga at hann reið kapp hvørt ár, í samfull 68 ár.

Í 2014 fekk Svenning handaða silvurnálina hjá Ítróttasamband Føroya og í 2017 var hann sum fyrsta reiðfólk í Føroyum eisini heiðraður við gullnálini hjá ÍSF. Bæði tvey væl uppibornir heiðrar til ein ítróttarmann sum tá hann takkaði fyri heiðurin, heldur enn at sóla sær í hesum, heldur vísti á stóra arbeiði sum nevndinar í Føroya Ríðingarfelag hava gjørt at bøta um umstøðurnar hjá kappríðingini. Soleiðis gera røtt stórmenni, takk Svenning.

Sjálvt um Svenning ikki ríður kapp longur, so er hann tó enn at síggja á rossabaki einaferð um árið. Hetta er til árligu ólavsøkuskrúðgonguna. Svenning hevur ikki ross longur, men hevur seinastu árini lánt hestin Spaða frá Berghestum og hetta er hann teimum sum skilst sera takksamur um.

Vil at enda takka Svenning fyri hansara íkast til okkara ítrótt og okkara felag. Svenning hevur riðið kapp á Velbastaðvegnum, við Leynavatn og við Marknagil. Eg má siga at eg hevði unt hont honum at roynt nýggju stásiligu breytina úti í Havnardali, men tá tað ikki skuldi vera, so er helst passandi at stóri dagurin verður hildin í felagshúsinum og hvør veit um ikki okkurt ross verður at síggja á breytini í dag, hetta at heiðra mikla reiðkappa okkara.

Hjartaliga til lukku Svenning og takk fyri tey mongu tøkini tú hevur tikið fyri okkum sum felag.

Vegna Føroya Ríðingarfelag

Brandur í Dali

FR slips

So vóru endiliga nøkur FR slips at fáa - Fáast til keyps við at senda mail til brandur@idali.fo. 

Kostnaður kr. 300,- pr stk. Avmarkað nøgd. 

Limabræv

 Góðu limir - Hetta limabrævið við skrá fyri komandi vetur og kunning um limagjald, verður í næstum sent út sum teldupostur.

Minst til at fyri at kunna brúka økið hjá FR, breytir, høll, fjós o.a. so er neyðugt at hava limaviðurskiftini í ordan.

Arbeitt verður við at fáa sjalvirkandi limaskipan, vónandi verður hon virkin komandi ár.

Allar FM kappingar í 2026 síggjast her: https://ridisamband.fo/kalendari/