Væleyðna ólavsøkukappríðing

Eiðishesturin Bragi vann Tvíspor l flokk tvíspor

 Undan ólavsøkukappríðingini í ár, vóru stór ivamál hjá fyrireikarunum, um hvussu tað mundi fara at ganga. Orsøkin var tann at gamla ríðibreytin ið Føroya Ríðingarfelag bygdi í 1970, er klovin í tvey av nýggja innkomuvegnum. Men aftaná stórt fyrireikingararbeiði og við góðari hjálp frá Berghestum, Articon og Tórshavnar Kommunu, so eyðnaðist at hava eina brúkbara breyt, so kappast kundi. 

Hetta var umráðandi fyri felagið, tí tað hevur verið kappast í kappríðing á hvørjari ólavsøku síðani 1936, tí legði felagið so nógv fyri, at røðin ikki var brotin. 

Kappingin eyðnaðist eisini væl, 35 ross vóru við og rætiliga fitt av fólkið var komin niðan í Marknagil at hyggja. Fyrsta greinin var tølt, hana vann á Silja G. Eystberg á hestinum Tango,´í hølinum á henni komu Johannessen brøðurnir Regin og Bárður á ávíkavist Brynjar og Stráki. Síðani var kappast í Skeið, har vann Yrsa H. Djurhuus á Orku, nr 2 gjørdist Jóannes Debes á Brúna. 

Í Trav var tað aftur Yrsa H. Djurhuus ið vann, hesaferð á hestinum Grettir, nr. 2 var Marner Joensen á Glettu og nr. 3 Lív Djurhuus og Dropi. Tvíspor ung vann Simona Tornby á Kiljan, nr 2var Hanus Patursson á Spirit og nr 3 gjørdist Sólrun S. Lútzen á Thor. Tvíspor vaksin ll flokk vann veteranurin Annfinn Reinert á Urd, nr 2 var ein annar veteranur, Hans Pauli Poulsen á Tindi, nr. 3 gjørdist Rebecka Jørgensen á Tobba. 

Tvíspor vaksin l flokk vann Alberg B. Lútzen á hestinum Braga, nr. 2 gjørdist Silja G. Eystberg á Óðin og nr. 3 Beinta Niclasen á Freyr. 

Ása og Strákur ríða fremst í ólavsøkuskrúðgonguni

 

Tað verður heilt serstøk løta hjá 17 ára gomlu Ásu Bárðardóttir, tá ólavsøkan verður sett í ár. Ása Bárðardóttir skal ríða á odda og vera flaggberi í ólavsøkuskrúðgonguni. Orsøkin er tann at hon í fjør vann FM í tvíspor vaksin í kappríðing. Siður hevur seinastu árini verið, at FM vinnarin far í boði at ríða fremst á ólavsøku árið eftir. Um FM vinnarin ikki tekur av, so er tað nevndin í Føroya Ríðingarfelag sum heitur á annað reiðfólk um at bera flaggið. 

Ása Bárðardóttir hevur riðið frá tí hon var heilt lítil og hevur fleiri ferðir vunnið FM í Tvíspor ung. Í fjør var fyrsta árið honn kappaðist millum tey vaksnu, men har gjørdi hon bart og vann FM heitið sum einans 16 ára gomul. Tá hon ríðir kapp er tað á sínari egnu ryssu Sílfu, men nú til skrúðgonguna, fer hon at ríða á Stráki, sum familjan eigur. 

Skrúðgongan er gamla ólavsøkusiður ið byrjaði longu í 1942. Reiðfólkini tóku stig til hana og vóru í byrjani einasti ítróttarfólkini í skrúðgonguni, men so líðandi eru fleiri og fleiri ítróttargreinar komnar við. Fyri nøkrum árum síðani komu so eisini býráðspolitikkarir við. Enn eiga rossini tó heiðurspláss í skrúðgonguni og eisini siðvunna plássið at standa á Tinghúsvegnum framvið garðinum hjá Jacob Lútzen og Anton Degn, júst sum tey hava gjørt í væl yvir hálva øld.

Kappríðing verður í Marknagili ólavsøkudag kl.15.00

Ólavsøkudag kl.15.00, verður tann árliga ólavsøkukappríðingin.

Tilmeldingarfreistin er fríggjakvøldið 26. juli kl.19.00

Ólavsøkukappríðingin verður aftur í ár í Marknagili

Ólavsøkukappríðing hevur verið á hvørjum árið síðani 1936

Tað hevur valdað stór óvissa um hvussu fór at vera við kappríðingini á ólavsøku í ár. Kappríðing var fyrstu ferð á ólavsøku í 1921 og aftaná ein lítlan steðg hevur hon verið fast hvørt ár síðani 1936. Vegna nýggja innkomuvegin uppi í Marknagili, hevur tó verið óvist um hvussu fór at vera í ár.

Nú meinar nevndin í Føroya Ríðingarfelag tó at at hava funnið eina nøktandi loysn, tað er ikki ein optimal loysn, men felagið vil leggja nógv fyri, at røðin av kappríðingum ikki skal vera brotin. 

Tí hevur felagið við góðari hjálp frá Articon, Tórshavnar Kommunu og Berghestum gjørt eina ætlan, so ríðast kann í Marknagili aftur í ár. Ætlanin er at venda breytina og sostatt ríða øðvugtan veg. Hetta viðførir nakrar avjóðingar við áskoðarum, parkering o.a. Men vónin hjá felagnum er at hetta kemur at ávirka sum minst. 

Nógv fólk hava sum fastan sið at byrja ólavsøkudag við kappríðing, tí metir Føroya Ríðingarfelag at tað er neyðugt at finna loysnir, so ríðast kann í Marknagili. Hetta er kanska serliga átrokandi nú so nógvir aðrar ítróttargreinar eru givnar at hava kappingar á ólavsøku.

Nærri kunning kemur seinni.