Hans Vilhelm seksti

Hans Vilhelm klippir bandið á nýggju ríðibreytini

Fyrrverandi og longstsitandi formaður felagsins, Hans Vilhelm Lútzen, rundaði í gjár 22 august, stóran markastein, tá hann gjørdist seksti ár. 

Føddir í 1965 og hetta beint inn í ein heim fyltan av rossum og kríatúrum. Foreldrini vóru Kára og Lútje Lútzen og vóru nógv av barnaárinum brúkt í Norðadali, har familjan hevði garð. Tey fluttu tó tíðliga til Havnar og setti búgv úti á Velbastaðvegnum, har húsast hann enn, men nú í nýggjum stásiligum húsum ið hann bygdi beint við síðurnar av barnaheimimum. Fjós og ross høvdu tey tá uppi á Lútzenstrøð í eysturbýnum. 

Hans Vilhelm arbeiddi við ymiskt fyrifallandi á ungum árum, m.a. var hann til skips við Fame. Hann fór tó tíðliga í læru til snikkara, hetta var hjá Bjarka uppi undir Varða. Stutt eftir at hann var liðugur byrjaði hann at arbeiða sjálvstøðugt og tað gerð hann enn tann dag í dag. Fyritøkan HVL hevur tikist við nógv ymiskt og til tíðir hava nógv fólk verið í vinnu hjá honum. Nú er hann tó farin at "trappa niður" sum hann sjálvur tekur til. Seinasti árini hava hann og bróðurin Andrias arbeitt við at gera økið hjá okkara felag klárt til nýggj fjós. 

Hans Vilhelm hevur verið ein sjáldsama góður maður fyri felagið. Tað at hann hevur sitið sum formaður í nærum tjúgu ár, talar fyri seg, hetta var ein tíð har nógv hendi í felagnum, m.a. var ríðihøll bygd og økið var gjørt byggibúgvið til fólk at byggja fjós. Sjálvt aftaná at hann gavst sum formaður, hevur hann verið sera virkin, hann hevur t.d. framvegis ábyrgd av at skaffa stuðlar til Djóradagar. Eisini var tað hann sum var stóð fyri at fáa rossasøguna niðurfelda á papír, við bókini "Ross og fólk" sum Uni Arge  hevur skrivað. 

Sjálvur hevur hann eisini verið virkin í ítrótti. Umframt at ríða kapp hevur hann eisini róð kapp, har hann gjørdist føroyameistari við bæði Ørvi og Havnarbátinum. Áhugan í kappróðri hevur hann enn, tað sigst at hann rópti so nógv, nú tá Havnarbatúrin vann FM á ólavsøku, at tað tók honum eina góða viku at fáa røddina, so nøkulunda uppá pláss aftur. 

Hans Vilhelm er giftur við Hildigunn Láberg og saman eiga tey sonin Ova. 

Til lukku við degnum Hans Vilhelm og takk fyri mongu tøkini 

Summarið 1968, saman við pápanum 

Riðið kapp í 40 ár

 

Hans Pauli Poulsen far handa steyp og gávu

78 ára gamli Hans Pauli Poulsen í Havn, hevur í heyst riðið kapp í samfull 40 ár. Hetta helt Føroya Ríðingarfelag var vert at markera, so nú heystkappríðingin var, fekk hann handað eina gávu frá felagnum. Samstundis fekk ryssan hjá Hans Paula Poulsen eisini handa ferðasteyp fyri at hava vunnið oftast á heystkappríðingini síðani steypið var latið í 2009. 

Svanna gjørdist nummar trý í Tvíspor 1 flokki á degnum, men tað var Barbara R. Mouritzen sum sat á hendan dagin. Hans Pauli Poulsen luttók sjálvur í 2 flokki á hestinum Tindi. Teir báðir gjørdist nummar 3 í flokkinum. 

Hans Pauli Poulsen á Tindi móti Elisabeth Niclasen á Bleiki

Kunning í samband við skrúðgongu og setana á ólavsøku.

Sum vanligt møta vit ólavsøkuaftan, í seinasta lagið kl 13:30, uttanfyri kommunuskúlagarðin.

Búnin er sum vant hvít skjúrta og svart slips - Hjá okkum reiðfólkum er ein eyka ábyrgd, í mun til onnur í skrúðgonguni. Lutvíst tí reiðfólk byrjaðu ólavsøkuskrúðgonguna á sinnið, men eisini tí vit vara av einum stórum kraftmiklum djórið.

Tí vilja vit inniliga heita á reiðfólk at bara koma við rossum ið eru rólig og tola gang og troðkan, serliga nú áin á vaglinum er komin aftur og tekur nógv pláss.

Málið hjá okkum er ikki at vera størsta ítróttarfelag í skrúðgonguni, men heldur at fólk aftaná skrúðgonguna hugsa, at hatta vóru nøkur flott og væl vand ross, ið vóru við til skrúðgonguna.

Við rossakvøðu - Góða ólavsøku

P.s. Øll skula vera í hjálmi

Silja ber Merkið oman á Vaglið

 

Silja Geirsdóttir Eystberg og Óðin

Fyri tey flestu byrjar ólavsøkan tá hornblástur og  rossagneggj nærkast Vaglinum og riðilin av ítróttarfólkum finna sær pláss á tinghúsvøllinum, at lurta eftir røðu og sangi. Í ár verður tað sjálvur kendi hondbóltsleikarin Turið Arge Samuelsen ið setur ólavsøkuna. Kann nevna at pápi hennara Uni Arge hevur skriva bókina Ross og fólk um ríðisøguna í Føroyum. Eini abbin hjá Turið, er kendi reiðmaðurin Sjúrður Samuelsen 

Ólavsøkuskrúðgongan er gamal siður, reiðfólk tóku stig til skrúðgonuna longu í 1942. Saman við hornblásarum frá frelsurnarherinum byrjaði skrúðgongan niðri í Bø, uttanfyri hjá bakarinum í Hornið og umvegis Tróndargøtu endaði hon sum í dag á Vaglinum.

Teir ið løgdu ráð fyri hesari skrúðgonguni vóru Kjartan Mohr, Edvard Samuelsen og Gustav Reinert. Á odda fyri gonguni var annar kendur havnarmaður Vilhelm Tórsheim, eisini kallaður keisarin.

Skrúðgongan eyðnaðist so væl at tað gjørdist afturvendandi tiltak, fyrstu árini vóru tað bert reiðfólk, men so líðandi komu róðrarfólk og onnur ítróttarfólk eisini við. Seinasta er, at nú eru býráðspolitikkarar úr havn eisini komnir uppí part hesa hátíðarløtu.

Enn sum áður eru reiðfólk og hornblástur. tó sjálv ímyndin av skrúðgonguni. Ólavsøkan hevði helst verið munandi minni hátíðarlig, um ikki reiðfólk tóku sær stundir at vera við til skrúðgonguna. Frá fyrsta degi, í 1942 hevur búnin hjá reiðfólkunum verið tann sami, hvít skjúrta og svart slips.

Í ár verður tað Silja Geirsdóttir Eystberg ið ber Merkið og gongur á odda fyri skrúðgonguni. Unga havnakvinnan vann FM í tvíspor seinasta ár og vann sær harvið eisini rættin at ríða á odda fyri skrúðgonguni. Hon ríður á hestinum Óðin, sama hestinum sum hon vann FM við. Óðin er 23 ár og pápi Silju Geirsdóttir Esytberg, Geir Wardum eigur hestin.

Annars var tað sum flestum kunnugt í nógv ár Sverri Trónd, ið bar Merkið vegna Føroya Ríðingarfelag. Men tá hann legði frá sær, valdi nevndin í Føroya Ríðingarfelag, at royna ein leist. har føroyameistarin í tvíspor, árið frammanundan far hendan heiður. Um føroyameistarin ber seg undan, er tað nevndin í felagnum ið velur fólk at vera flaggberi.

Annars kann nevnast at í nógv ár vóru tvær skrúðgongur við rossum á ólavsøku. Fyrr var eisini skrúðgonga til ríðibreytina ólavsøkudag. Tá gekk skrúðgongan frá vaglinum til ríðibreytina. Fyrstu árini á Velbastaðvegnum, men frá 1971 niðan á breytina við marknagil.

Silja Geirsdóttir Eystberg og Óðin við Leynavatn 2024

Sverri Trónd Hansen ber Merkið 

Nýggja ríðbreytin verður klár, men ikki liðug

f.v. Andrass Andreasen, Grettir, Hans Vilhelm Lútzen, HVL og Brandur í Dali, Føroya Ríðingarfelag 

Síðani tíðliga farna vetur, hevur verið arbeitt av øllum alvi, úti á økinum hjá Føroya Ríðingarfelag í Havnardali

Tvey byggifeløg, Grettir og HVL, bæði undir leiðslu av reiðmonnum hava lagt alla orku í at fáa fáa nýggju ríðibreytina klára til ólavsøkukappríðingina. Hetta sær nú eisini út til at eyðnast. 

At tað verður sagt at hon verður klár, men ikki liðug, merkir at hetta er partur av størri verkætlan, ið eisini umfatar tvær smærri rundbreytir, liðugtgerð av størri verandi rundbreyt á økinum, girðingar framvið flestu breytirnar, umframt ljóðanlegg, áskoðarapláss o.a.

Tað sum verður liðugt er 400 mtr. breytin og avrenning til hesa, nakað av girðingum, umframt brúgv og gøtuskipanir at koma til máløkið.

Tað er áhugavert at hetta er fyrstu ferð í søguni hjá felagnum, ið er stovnað í 1943, at kappast verður á egnum økið. Kappríðingar byrjaðu í Havn í 1921, fyrstu árini var kappast á Sundsvegnum, men longu í 1928 var farið út á Velbastaðvegin. Har var so kappast líka til í 1970, tá felagið hevði bygt sær egna stásiliga breyt í haganum uppi í Marknagil. Hendan breyt er so brúkt til í fjør, tá tað gjørdist klárt at Húsareynstunnilin ávirkaði breytina óv nógv til at hon kundi brúkast longur.

Samráðingar við Tórshavnar Kommunu, førdi til at kommunan lat endurgjald fyri breytina í Marknagili, endurgjald sum felagið nú hevur brúkt til at byggja sær nýggja breyt í Havnardali. 

Fyrsta kappríðingin á nýggju breytini, verður ólavsøkudag kl 15 og sjálvt um nógv skal gerast betri til næsta ár, so vónar felagið, at nógv fólk koma, at vera við nú breytin verður tikin í nýtslu.     

Kappríðing á Sundsvegnum

Kappríðing á Velbastaðvegnum

Heystkappríðing 1970, fyrsta kapping í Marknagili

Kappríðing í Marknagili

Breytin í Marknagili

ÓLAVSØKA 2025

 

Leynavatn 2025

 

Hug at byggja fjós ?

 

Nú verður grivið av til framhald av byggistig lll, uppi á bakkanum.

Um tú hevur áhuga í at byggja egið rossahús, einsamallir ella saman við øðrum. So er at seta teg í samband við okkum á mail: brandur@idali.fo ella á tlf. 511618.

Í Reiðhøllini er turt

 

                                                                                Mynd: Rani í Dali 

Veðrið má sær valda, Djóradagar hjá Føroya Ríðingardali, í Havnardali halda fram í dag, tó við broyttari skrá. 

Vegna veður er vælumtókta ponyríðingin flutt inn í Reiðhøllina hjá felagnum. ponyríðingin verður frá kl 17 til 18. Av somu orsøk verða hoppiborgirnar lagdar niður kl 16:50. Rossini ræðast larmin frá hoppiborginum, tí er hetta neyðugt. 

Onkrar aðrar smávegis broytingar eru eisini, onkur djór sum stóðu úti, eru tikin undur tak, og eisini hevur felagið raðfest djóravælferðina og koyrt okkurt ungt djór heim aftur til bóndan, so tað ikki skuldi standa úti í hesum veðrinum. 

Men enn er nógv at koma til í Havnardali í dag og er mestsum alt virksemi undir taki, deilt út á nøkur fjós, Reiðhøllina og felagshúsið hjá felagnum. 

Tiltakið er opið frá kl 14 til 18  og øll eru vælkomin. 

                                                                             Mynd: Rani í Dali 

Djóradagar 2025 vera 24 og 25 mai

 

Vælumtókta tiltakið hjá Føroya Ríðingarfelag, Djóradagar verður í ár tann 24 og 25 Mai.  

Hjá nógvum familjum er tað vorðin siður, at leggja sær leiðina út í Havnardal tá Djóradagar eru. Tey hava har høvið at vitja djórini sum vanliga eru í dalinum, umframt nógv onnur forkunnug djór sum ikki eru at síggja vanliga.

 Eisini er hetta ein gyltur møguleiki at hitta vinir, og fólk ein vanliga ikki sær í dagligdegnum. 

Føroya Ríðingarfelag skipar eisini fyri kaffisølu og vera sum vant hoppiborgir o.a. til børnini. Teymaríðing ella ponyríðing sum tað eisini verður kallað er nakað sum er ovarliga á "to do" listanum hjá teimum flestu. Felagið hevur eina risa ríðihøll har nógv av tiltøkunum eru inni í, hetta er onkuntíð hent um okkurt ælið er. Eisini er felagshúsið nýligani umbygt og eru tí enn betri møguleikar at kroka eina løtu um okkurt ælið skuldi komið. 

Djóradagar er eitt familjutiltak burturav og er stuttligt at síggja somu snýðini ár aftaná ár. Tey vaksnu sum fyrstu árini komu við sínum børnum, koma nú við ommu og abbabørnum, umframt at nýggj andlit leggjast afturat á hvørjum árið. Hetta er greitt tekin um, at tá felagið byrjaði hetta tiltak á sinni, hava tey rakt ein tørv sum ikki hevur verið nøktaður áðrenn.

Tiltakið er báðar dagar, 24 og 25 mai.

opið frá kl 14 til 16.

Takk fyri alt góði Helgi

Hóast deyðsboðini um Helga Brekku ikki komu heilt óvæntað, so koma tílík boð altíð óvart á. Ikki tað, Helgi var eingin unglingi, bara knapt ár yngri enn Frans pávi, ið eisini andaðist herfyri.

Helgi var bankamaður í tí tíðini har tað kanska meira enn nú var hildið uppá normarnir. Ja, kanska var tað akkurát tí at hann fekk sær eitt frítíðarítriv sum rossafólk, ein heimur har normar mest sum ikki eru til. Honum dámdi í øllum førum væl at skifta úr fínu klæðunum í vásaklæðini og sleppa sær ein túr í hagan, har eingin spurdi um rentur og valutakursin.

Hann hevði eisini nógvar vinir í rossaverðini og hetta var hildið við líka til heilt fyri stuttum, hetta við at ganga til kaffi í felagshúsinum hjá Føroya Ríðingarfelag. Har hittast fólk frídagar til morgunkaffi og eisini har fer heilt vist at vera saknur í vælumhugsaðu, speisku og ofta beinraknu viðmerkingunum hjá Helga.

Helgi hevur havt nógv álitisstørv í felagnum, m.a. sat hann í dómsnevndini og var eisini kassameistari og skrivari í nógv ár. Hetta og alt annað hann hevur gjørt fyri felagið vilja vit takka honum fyri.

Føroya Ríðingarfelag vil við hesum fáu orðum lýsa frið yvir minnið um Helga Brekku og vísa samkenslu við børn, abbabørn og onnur ið vara av.

Magnus á Kamrinum 95 ár

Magnus var føddur 20/04-1930  og vaks upp í Conradsbrekku í Havn, foreldrini vóru Hanna f. Lauritsen og Vilhelm Jacobsen

Hann giftist tíðliga við Juliu f. Winther- Tey átti fimm børn, Hanna, Jónrid (sála), Vilhelm, Rosa og Jóan Jakku. 

Magnus arbeiddi á skrivstovuni hjá Strandfaraskip Landsins í nógv ár, har var hann kendir sum eitt álitisfólk ið hevði gott skil fyri tí hann gjørdi. 

Magnus abbin reið tað tíðina nógv saman við hornamonnunum og kom yngri Magnus helst inn í rossaverðina tann vegin. Ungdómsárini reið Magnus sjálvur mest saman við Jacob og Lútja Lútzen, umframt Óla Jákup Múller.

Mest kenda rossið hjá Magnusi var helst Unkas, svartflekkuttur hestur sum bar Magnus nógvar túrar í fjøllinum á Streymoynni, mest til Norðadals, fyri vestan og eisini onkrar túrar bæði longri norðri og aðrastaðni á oynni.

Magnus er eisini kendur fyri at hava tikið nógvar myndir og filmar av m.a. ríðing og øðrum søguligum tilfari. M.a. tók hann film tá teir reiddu tilfar niðan á Núgvuna, hetta í samband við bygging av Nato hernaðarstøðini - Upprunaliga var ætlanin at støðin skuldi byggjast á Núgvuni, men hendan ætlanin var seinni broytt. 

Umframt hetta kenna fólk Magnus sum tónleikara, hann spældi nógv ár í Gogguni, sum var best umtókti tónleikabólkurin í landinum í sínari tíð. Eisini gjørdi hann fimleik, hetta gavst hann ikki við, fyrr enn hann var komin langt upp í fýrsini. 

Føroya Ríðingarfelag vil við hesum ynskja Magnusi á Kamarinum, hjartaliga til lukku og takka fyri øll góð minnir á leiðini.  

Trý nýggj fólk í nevndina

f.v. Laila W. Mouritzen, Barbara R. Mouritzen, Birita B. Lútzen
Eva L.S. Klemmentsen, Osvald S. Johanson, Brandur í Dali og Alberg B. Lútzen

Tað vóru umleið 60 fólk savnaði til aðalfund hjá Føroya Ríðingarfelag í gjárkvøldið. Tey høvdu ein friðarligan aðalfund har roknskapur og formansfrágreiðing var góðtikið uttan stórvegis viðmerkingar. 

Kunnað var m.a. í formansfrágreiðingini um gongdina í verkætlananum ið felagið fremur í løtuni. Hetta umfatar m.a. at gera byggibúgvið til nýggj fjós, umframt gerð av nýggjari ríðibreyt á økinum hjá felagnum. 

Sum vant var eisini nevndar og formansval. Nýggj í nevndini er Barbara R. Mouritzen og nýggir tiltakslimir eru Laila W. Mouritzen og Alberg B. Lútzen. Brandur í Dali var afturvaldir til formann. 

Nýggja nevndin fer beinanvegin til verka, fyrsta tiltakið er longu leygardagin, tá siðbundna ringríðingin er í høllini, síðani verður lagt til brots við fyrireikingum til Djóradagar og kappríðingarnar ið vera í summar.   

 

 

Aðalfundur verður í felagshúsinum týsdagin 25/02-2025 kl.19.00

Skrá sambært viðtøkunum

Uppskot til aðalfundin, skulu verða felagnum í hendi, í seinasta lagi 8 dagar undan fundinum

Um neyðugt verður eykaaðalfundur 5 min. seinni. 

Fjósanevndin hevur fund sama dag kl.18.00

Nevndin

Høvdingur fyllir sjeyti

 

Vónandi far tú okkurt gott at eta í dag - til lukku 

Í dag fyllir ein tann størsta ímyndin av ríðing sjeyti ár. 

Leif Berg byrjaði tíðliga at ríða og var ofta til kappríðingar og mangan lá væl fyri hjá honum. 

Tá gongulagskappingar byrjaði lá hann eisini fram við og eigur hann eisini nógv steyp í hesum høpi.

Mest kendur er Leif sjálvandi fyri fyritøkuna BergHestar, hann sá tiðliga tørvin á einum skipaðum ríðiskúla og byrjaði í smáum niðri undir Gráasteini. Eingin ivi er í at hetta er ein av høvuðsorsøkunum at ríðing er vaksin so nógv, bæði í Havn, men eisini runt oyggjarnar. 

Fyritøkan vaks eisini skjótt og húsast tey nú í stásiligum sammantvinnaðari ríðihøll, fjós og íbúð uppi undir Marknagili, beint niðanfyri gomlu ríðibreytini hjá Føroya Ríðingarfelag. Fyritøkan BergHestar fæst eisini við ríðing við ferðafólkum og sjálvsagt eisini fyri føroyingar sum hava hug at fara á rossabak. 

Leif er kendur millum manna fyri at vera góður í ráðum og at vera sera hjálpsamur. Hetta hava vit í Føroya Ríðingarfelag mangan notið gott av, og vilja vit geva honum eina stóra tøkk fyri hjálpsemið.

Nú Leif Berg fyllur 70, er hann farin við konu, soni og góðum vinfólkum at standa á skíð í alpunum. Vónandi hava tey teldusamband har tey eru, so hann sær hesa heilsu, facebook o.a. moderna hevur hann ikki, so heilsan má skrivast her á heimasíðuni.

Til lukku Leif, vit vóna dagurin verður tær góður og at tú far okkurt gott at eta í kvøld 

Brandur